شكلها سافرت

شكلها سافرت للكاتبه سهى الفقي – رواية في ادب العلاقات

الكتاب ده للّي حب وما طالش، واللي حب وما اتحبّش، واللي ما عرفش يحب.

الكتاب ده للناس اللي بتعرف تفرح، والناس اللي بتدّي الزعل حقه. للحزين اللي بيخبّي مشاعره ورا ابتسامة، والفرحان اللي خايف من الحسد.

الكتاب ده لكل حد فضل يدوّر على حاجة لفترة طويلة واكتشف إنها مش موجودة بس ما بطّلش تدوير.

للّي في علاقة ناجحة، واللي في علاقة نفسه تنجح، واللي ما عرفش يدخل علاقة بس نفسه يجرّب، واللي مش مؤمن بالعلاقات خالص بس بيفرح لما يشوف اتنين مبسوطين مع بعض.

الكتاب ده للّي ناسيين نفسهم، واللي فاكرين حلمهم، واللي شبطانين في الحياة، واللي بايعين القضية، بس مش أوي.

يمكنك زيارة صفحة الكتاب على موقع goodreads من هنا

• رأي القارئة: وسام محمود

“لأن مجموع إللي أعرفه عن الحياة والدنيا قليل جدًا
ولأن معظم إللي أعرفه أو بافكر فيه صعب عليَّ أعبّر عنه
ولأن كل بنت جواها عشروميت شخصية كلهم متلخبطين وبيتخانقوا مع بعض
ولأن سها عرفت تهدّيهم كلهم جوايا وتساعد كل شخصية إنها تقول إللي محتاجاه بوضوح كخطوة أولى للتفاهم ومحاولة للوصول لمنطقة مرضية للجميع…
الكتاب دا لمسني.”

• رأي القارئة: يمنى عبدالله

“الكتاب حلو جدا انصح بقرايته يعنى لو بنت اكيد هتلاقى نفسك فيه ولو ولد ممكن يساعدك تفهم دماغ اى بنت او على الاقل يخليك تقدر تفهم انت ليه عمرك ماهتلاقي اجابه لل سؤالى الازلي “ماذا تريد المرأه؟”..سها الفقي قدرت تنتقد حاجات كتير مش بشكل درامى بالعكس بطريقه خفيفه يعنى وانت بتقرى هتضحك وتفكر فنفس الوقت
فى البدايه كنت فاكراه الكتاب مذكرات شخصيه وانا عاده مابتشدش للنوع ده لكن الحقيقه الكاتبه شاطره جدا وقدرت تدخل الاحداث ف قالب روايه يمنعك من انك تمل لحظه واحده ..من الاخر الكتاب سهل بسيط حقيقى يوصل للقلب والعقل وانصح بيه”